Հարգելի գործընկերներ,
2006թ. դեկտեմբերի 22-25-ը ԺՆԵԿ ՀԿ հանրային հարաբերությունների բաժնի ղեկավար
Տաթևիկ Քոչարյանը մասնակցեց Վրաստանի մայրաքաղաք Թբիլիսիում կայացած «Երիտասարդական
ակտիվությունը և երիտասարդական մշակույթը Հարավային Կովկասում» թեմայով տարածաշրջանային
երիտասարդական հավաքին: Նշված միջոցառմանը մասնակցում էին Հայաստանի, Ադրբեջանի,
Լեռնային Ղարաբաղի և Վրաստանի Հելսինկյան Քաղաքացիական Ասամբլեայի գրասենյակների
երիտասարդ ակտիվիստներ: Հավաքը կազմակերպվել էր Հելսինկյան Քաղաքացիական Ասամբլեայի
կողմից` իրականացվող «Վստահության կառուցում» ծրագրի շրջանակներում: 
2006թ. դեկտեմբերի 21-ին «Ժողովրդավարական նախաձեռնությունների երիտասարդական
կենտրոն» ՀԿ-ի կողմից «Հակածխախոտային գործողությունների շարք Վանաձոր քաղաքում»
ծրագրի շրջանակներում կազմակերպվեց «Ծխախոտի իրացման, սպառման և օգտագործման
սահմանափակումների մասին» ՀՀ օրենքի կիրարկումը Վանաձոր քաղաքում» թեմայով կլոր
սեղան քննարկում:
Կլոր սեղանի նպատակն էր վանաձորյան շահագրգիռ հասարակական կազմակերպություններին ներկայացնել վերոհիշյալ ծրագրի իրականացման ընթացքը, ինչպես նաև բարձրացնել հանրային տեղեկացվածությունը «Ծխախոտի իրացման, սպառման և օգտագործման սահմանափակումների մասին» ՀՀ օրենքի պահանջների վերաբերյալ:
Կլոր սեղանին ներկա էին Վանաձորում գործող ակտիվ հասարակական կազմակերպությունների,
ինչպես նաև զանգվածային լրատվության միջոցների ներկայացուցիչներ:
Այս կապակցությամբ ԺՆԵԿ ՀԿ-ն իր շնորհավորական ուղերձն է հղում բոլոր նրանց, ովքեր կիսում են Հռչակագրով ամրագրված արժեքները և ջանք չեն խնայում դրանց հաստատման համար:
2006թ. դեկտեմբերի 9-ին ԺՆԵԿ ՀԿ գրասենյակում կազմակերպվել էր Մարդու իրավունքների
միջազգային օրվան նվիրված միջոցառում, որին մասնակցեցին ԺՆԵԿ ՀԿ անդամներ, երիտասարդ
իրավաբաններ և ԺՆԵԿ ՀԿ Մարդու իրավունքների իրավաբանական կլինիկայի ուսանողներ:
Միջոցառման ընթացքում ԺՆԵԿ ՀԿ խորհրդի անդամ, մարդու իրավունքների մասնագետ`
Էդմոն Մարուքյանը դասախոսություն կարդաց «Մարդու իրավունքները վերափոխվող աշխարհում»
թեմայով: Դասախոսությունից հետո ծավալվեց ակտիվ քննարկում մարդու իրավունքների
հասկացության և մոտեցումների, ինչպես նաև Հայաստանում մարդու իրավունքների վիճակի
վերաբերյալ:
Հարգելի գործընկերներ,
Ուրախ ենք ձեզ տեղեկացնել, որ սույն թվականի նոյեմբերի 26-ից դեկտեմբերի 2-ը
Հունգարիայի Բուդապեշտ քաղաքում կայացավ Campaigning for Human Rights Education: Dilemmas and Opportunities
for Actors in Youth Work and Non-Formal Education դասընթացը, որի նպատակն էր ներդրում
ունենալու «Բոլորը տարբեր - բոլորը հավասար» արշավին, ինչպես նաև մշակել ողջ
Եվրոպայի տարածքում իրականացվող մարդու իրավունքների կրթության միջոցառումների
կայուն աջակցությանն ուղղված ռազմավարություն: Դասընթացի ընթացքում հիմնադրվեց
«Մարդու իրավունքների կրթության երիտասարդական ցանց» միջազգային կազմակերպությունը:
ԺՆԵԿ ՀԿ-ն, ի դեմս խորհրդի անդամ Էդմոն Մարուքյանի, դարձավ սույն ցանցի հիմնադիր
անդամ: «Մարդու իրավունքների կրթության երիտասարդական ցանցի» գործունեությանը,
նպատակներին և խնդիրներին, ինչպես նաև անդամակցելու կարգին ծանոթանալու համար
կարող եք այցելել` www.hreyn.org
ԱՊՀ – Մահապատիժն անցնում է անցյալի գիրկը, սակայն դեռ բավականին անելիքներ կան:
Վերջին տասնամյակների ընթացքում, աշխարհը հետևողական առաջընթաց է արձանագրել մահապատժից հիմնավորապես հրաժարվելու գործում: Հարյուր քսանինը երկիր հրաժարվել են մահապատժի կիրառումից ինչպես օրենքով, այնպես էլ գործնականում: 2005թ. ընթացքում, աշխարհի միայն քսաներեք պետություններ են փաստացի մահապատիժ իրակացրել: Նոյեմբերի 28-ին տեղի ունեցավ ԱՊՀ երկրների գագաթաժողովը Մինսկում, որն այս տարի տոնում է իր ստեղծման տասնհինգամյակը: Հանդիպման նախօրեին Amnesty International-ը կոչ արեց ԱՊՀ մասնակից երկրների նախագահներին` մահապատժի վերացումը դարձնել օրակարգի առաջնային հարցերից մեկը և իրենց լիազորությունների շրջանակներում անել ամեն ինչ` տարածաշրջանից մահապատիժն իսպառ վերացնելու ուղղությամբ:
(Տեքստի ռուսերեն և անգլերեն տարբերակներին ամբողջությամբ կարող եք ծանոթանալ
համապատասխանաբար` http://www.amnesty.org.ru/pages/ruseur040032006
և http://web.amnesty.org/library/index/engeur040032006
կայքերից)
Հարգելի գործընկերներ,
2006թ. նոյեմբերի 28-ին ԺՆԵԿ ՀԿ-ի կողմից կազմակերպվեց «Հակածխախոտային գործողությունների շարք Վանաձոր քաղաքում» ծրագրի շնորհանդես: Ծրագիրն իրականացվում է ՀՀ պետական բյուջեից հասարակական կազմակերպություններին տրամադրվող դրամաշնորհի շրջանակներում` «Հասարակական երկխոսության և զարգացումների կենտրոնի» միջոցով:
Շնորհանդեսի ընթացքում նշվեցին ծրագրի խնդիրներն ու նպատակները, ինչպես նաև
ներկայացվեցին ծրագրի շրջանակներում տպագրված պաստառները, կարևորվեց դրանց
տարածման նպատակը: ՀԿ ներկայացուցիչները հանդես եկան համագործակցության և փոխաջակցության
կոչով` ընդգծելով «Ծխախոտի իրացման, սպառման և օգտագործման սահմանափակումների
մասին» ՀՀ օրենքի կիրարկման անհրաժեշտությունը: Շնորհանդեսին մասնակցում էին
տեղական լրատվամիջոցների և ՀԿ ներկայացուցիչներ:
2006թ. նոյեմբերի 24-ին «Ժողովրդավարական նախաձեռնությունների երիտասարդական
կենտրոն» ՀԿ-ն մասնակցեց «Մարդու իրավունքների և ժողովրդավարության ինստիտուտի»
կողմից կազմակերպված «Հայաստանի երիտասարդությունը` ի պաշտպանություն սոցիալական
արդարության» քաղաքացիական ակցիա-համերգին:
Ակցիայի ընթացքում ԺՆԵԿ ՀԿ-ն մասնակիցներին բաժանեց կազմակերպության մասին
բուկլետներ, իրականացվող ընթացիկ ծրագրերի մասին պատմող բուկլետներ, ներկայացվեցին
«Հակածխախոտային գործողությունների շարք Վանաձոր քաղաքում» ծրագրի շրջանակներում
տպագրված պաստառները և երիտասարդությանը կոչ արվեց միանալ ԺՆԵԿ ՀԿ-ին` պաստառների
տարածմանն աջակցելու նպատակով:
Նոյեմբերի 17-ին «ԺՆԵԿ» ՀԿ-ն «Քաղաքացիական վերահսկողություն ի պաշտպանություն
մարդու իրավունքների» ծրագրի շրջանակներում կազմակերպել էր կլոր սեղան-քննարկում`
նվիրված ձերբակալված և կալանավորված անձանց իրավունքների պաշտպանությանը: Կլոր
սեղանին մասնակցում էին Վանաձոր քաղաքում գործող փաստաբաններ, հասարակական իրավապաշտպան
կազմակերպություններ և ԶԼՄ-ներ: Կլոր սեղանի ընթացքում ծրագրի ղեկավար Էդմոն Մարուքյանը ներկայացրեց ծրագրի նպատակները և քաղաքացիական վերահսկողության մեխանիզմները, ինչպես նաև Եվրոպայի Խորհրդի Խոշտանգումների կանխարգելման կոմիտեի (ԽԿԿ) հաշվետվությունը 2004թ. ապրիլի արտահերթ այցի մասին, որը հրապարակվել էր կլոր սեղան-քննարկումից մեկ օր առաջ` նոյեմբերի 16-ին:
Կլոր սեղան-քննարկման հաջորդ բանախոս, ՀՔԱ Վանաձորի գրասենյակի ղեկավար, Արթուր Սաքունցը ներկայացրեց իր ղեկավարած կազմակերպության փորձը ձերբակալված և կալանավորված անձանց իրավունքների պաշտպանության գործում: Իրավապաշտպան կազմակերպությունների, փաստաբանների և ԶԼՄ-ների համագործակցության դերը կարևորվեց կլոր սեղան-քննարկման մասնակիցների կողմից և ծավալվեց ակտիվ քննարկում ձերբակալված և կալանավորված անձանց իրավունքների համակարգված պաշտպանության վերաբերյալ:
Freedom House միջազգային իրավապաշտպան կազմակերպությունը կոչ է արել «Հազարամյակի
մարտահրավերներ» կորպորացիային դադարեցնել օգնության տրամադրումը մի շարք երկրների`
այդ թվում նաեւ Հայաստանին՝ քաղաքական իրավունքների եւ քաղաքացիական ազատությունների
պաշտպանությունը չապահովելու պատճառով: 
Հարգելի գործընկերներ,
Պատիվ ունենք տեղեկացնելու, որ սկսած սույն թվականի հոկտեմբերի 20-ից մեկնարկել է «Հակածխախոտային գործողությունների շարք Վանաձոր քաղաքում» ծրագիրը: Ծրագիրն իրականացվում է Ժողովրդավարական նախաձեռնությունների երիտասարդական կենտրոնի կողմից, ՀՀ պետական բյուջեից հասարակական կազմակերպություններին տրամադրվող դրամաշնորհի շրջանակներում, Հասարակական երկխոսության և զարգացումների կենտրոնի աջակցությամբ:
Ծրագրի նպատակն է ՀՀ Լոռու մարզի Վանաձոր քաղաքում բարձրացնել հանրային տեղեկացվածությունը
«Ծխախոտի իրացման, սպառման և օգտագործման սահմանափակումների մասին» ՀՀ օրենքի
պահանջների և սահմանափակումների վերաբերյալ և քաղաքացիական վերահսկողության
միջոցով օժանդակել օրենքի կիրարկմանը:
Սեպտեմբերի 21-25ը ԺՆԵԿ ՀԿ հանրային հարաբերությունների բաժնի ղեկավար Տաթևիկ Քոչարյանը մասնակցել է Ռուսաստանի Դաշնության Սանկտ-Պետերբուրգ քաղաքում կայացած «Բոլորը տարբեր - Բոլորը հավասար». բազմազանության, մարդու իրավունքների և մասնակցության եվրոպական երիտասարդական քարոզարշավի (“All different – All Equal” European Youth Event for Diversity, Human Rights and Participation) շրջանակներում կազմակերպված միջոցառմանը: Նշված միջոցառմանը հրավիրված են եղել 400 մասնակից ողջ Եվրոպայի տարածքից ընտրված մարդու իրավունքների և երիտասարդության խնդիրներով զբաղվող կազմակերպություններից: Սույն քարոզարշավն ուղղված է տարաբնույթ խտրականությունների բացառման և համընդհանուր հավասարության ապահովմանը: Քարոզարշավը ներկայացնում է Եվրոպայի խորհրդի երիտասարդական քաղաքականության հիմնախնդիրների ու սկզբունքների ամբողջականությունը` ներգրավում և ներառում, համերաշխություն և սոցիալական համախմբվածություն:
Սեպտեմբերի 22-ին ԺՆԵԿ ՀԿ-ն հյուրընկալեց «Քաղաքացիական հասարակության ինստիտուտ» ՀԿ-ի կողմից կազմակերպված «Կապերի հաստատման սեմինարի» մասնակիցներին: Մասնակիցների թվում էին ներկայացուցիչներ Գերմանիայից, Իտալիայից, Լատվիայից, Լիտվայից, Էստոնիայից, Ռումինիայից, ինչպես նաև Թուրքիայից և Վրաստանից: Սեմինարի նպատակն էր եվրոպական կազմակերպություններին ծանոթացնել Հայաստանի և Վրաստանի երիտասարդական կազմակերպությունների ներկայացուցիչներին հետագա հավանական համագործակցության համար:
«Կապերի հաստատման սեմինարը» տեղի էր ունեցել Երևանում` ներգրավվելով տարաբնույթ հայաստանյան հասարակական կազմակերպություններ: Մասնավորապես, սեմինարի մասնակիցներն այցելեցին «Ժողովրդավարական նախաձեռնությունների երիտասարդական կենտրոն» ՀԿ: ԺՆԵԿ ՀԿ խորհրդի անդամ Էդմոն Մարուքյանը հյուրընկալեց մասնակիցներին և ներկայացրեց ՀԿ առաքելությունը, խնդիրները և գործունեությունը, տեղեկացրեց ընթացիկ և իրականացված ծրագրերի մասին: Պրն. Մարուքյանն արտահայտեց կազմակերպության պատրաստակամությունը հետագա համագործակցության համար:
Սեպտեմբերի 17-ին ՀՀ Գիտությունների Ազգային Ակադեմիայի նախագահության նիստերի դահլիճում կայացավ Համաշխարհային Հայկական Կոնգրեսի անդամ երիտասարդական հասարակական կազմակերպությունների ներկայացուցիչների համաժողովը: Համաժողովի ընթացքում հիմնադրվեց «Համաշխարհային Հայկական Կոնգրեսի Երիտասարդական Կազմակերպությունների Ասոցիացիան», հաստատվեց ասոցիացիայի գործունեության կանոնակարգը և անցկացվեց ասոցիացիայի ղեկավար մարմինների ընտրությունները, որի 11 անդամներից բաղկացած խորհուրդի կազմում ընտրվեց նաև «ԺՆԵԿ» ՀԿ խորհրդի անդամ` Էդմոն Մարուքյանը:
Համաժողովի ընթացքում երիտասարդները հանդես եկան Աշխարհի Հայ Երիտասարդությանն ուղղված ուղերձով: Ուղերձում համաժողովի մասնակիցները համագործակցության են հրավիրում բոլոր երիտասարդական կազմակերպություններին հանուն արժաապատիվ ապագայի, միջազգային հանրության բարօրության և խաղաղ գոյակցության: Այնուհետև Համաշխարհային Հայկական Կոնգրեսի Երիտասարդական Կազմակերպությունների Ասոցիացիայի ներկայացուցիչները այցելեցին Ծիծեռնակաբերդ` ծաղկեպսակներ դնելու Հայոց Մեծ Եղեռնի զոհերի հուշահամալիրին:
«Human Rights Watch» միջազգային կազմակերպությունը, որը ավելի քան 70 երկրներում
պայքարում է մարդու իրավունքների պաշտպանության համար, նամակով դիմել է Հայաստանին,
մասնավորապես, ՀՀ Վճռաբեկ դատարանի նախագահ Հովհաննես Մանուկյանին: Կազմակերպության
Եվրոպայի և Կենտրոնական Ասիայի մասնաճյուղի գործադիր տնօրեն Հոլլի Քարթները նամակում «խորը մտահոգություն» է հայտնել այն պնդումների կապակցությամբ, որ ՀՀ բանակի զորամասերից մեկում սպանություն կատարելու մեղադրանքով դատված Ռազմիկ Սարգսյանի, Մուսա Սերոբյանի և Արայիկ Զալյանի հանդեպ նախաքննության և դատավարության ընթացքում կիրառվել են խոշտանգումներ, նվաստացուցիչ և անմարդկային վերաբերմունք:
Հիշեցնենք, որ Սյունիքի մարզի առաջին ատյանի դատարանը վերոնշյալ զինծառայողներին դատապարտել էր 15 տարվա ազատազրկման, իսկ Վերքաննիչ դատարանը` գործը վերանայելով փոխել է վճիռը ցմահ ազատազրկման: «Հայաստան կատարած վերջին այցի ժամանակ «Human Rights Watch»-ը տեղեկատվություն է հավաքել տվյալ գործի կապակցությամբ: Չխոսելով դատապարտվածների մեղավորության կամ անմեղության մասին, մենք մտահոգված ենք, որ երկու դատարանի կայացրած վճիռները մեծապես հիմնված են եղել դատապարտյալներից մեկի` Ռազմիկ Սարգսյանի խոստովանական ցուցմունքների վրա: Կան բանական հիմքեր ենթադրելու, որ այդ խոստովանական ցուցմունքները նա տվել է կիրառված խոշտանգումների և կոպիտ վերաբերմունքի այլ ձևերի կիրառումից հետո: Խոստովանական ցուցմունքներ տալու տեսաժապավենի վրա Սարգսյանի երեսը ուռած է և կան կապտուկների հետքեր, ինչը լուրջ հիմք է տալիս մտածել, որ նա տուժել է` մինչև խոստովանական ցուցմունքները իր հանդեպ կիրառված վատ վերաբերմունքի արդյունքում»,- ասված է «Human Rights Watch»-ի նամակում:
Կազմակերպությունը նամակով հիշեցնում է, որ դատապարտվածների փաստաբանը բողոքով դիմել է Մարդու իրավունքների եվրոպական դատարան` մատնանշելով իր դատապարտյալների հանդեպ Մարդու Իրավունքների Եվրոպական Կոնվենցիայի բազմաթիվ կետերի խախտման փաստը: Նամակում հիշեցվել են նաև Հայաստանի կողմից ստորագրված միջազգային այն բոլոր փաստաթղթերը և կոնվենցիաները, որոնցով արգելվում է խոշտանգումների կիրառումը, իսկ այդ միջոցով ստացված ցուցմունքները չեն կարող լինել ապացույցներ:
«Նշված չափանիշների անտեսումը Հայաստանի ստանձնած միջազգային պարտավորությունների
լուրջ խախտում է»,- ասված է նամակում, որտեղ նաև հույս է հայտնվում, որ Վճռաբեկ
դատարանը տվյալ դատական գործի լսման ժամանակ հաշվի կառնի ներկայացված փաստերը.
«Human Rights Watch»-ը կարևորում է, որպեսզի հանձնարարական տրվի կիրառված խոշտանգումների
վերաբերյալ ահազանգի կապակցությամբ անհապաղ հետաքննություն կատարելու համար և
որպեսզի ձեռնարկվեն բոլոր հնարավոր միջոցները` ուժը կորցրած համարել խոշտանգումների
արդյունքում կորզված ապացույցների հիման վրա կայացված դատավճիռը»:
www.a1plus.am
Հարգելի գործընկերներ,
Պատիվ ունենք տեղեկացնելու, որ 2003թ.-ից գործող Համաշխարհային Հայկական Կոնգրեսի
բյուրոյի որոշմամբ «Ժողովրդավարական նախաձեռնությունների երիտասարդական կենտրոն»
հասարակական կազմակերպությունը անդամագրվեց «Համաշխարհային Հայկական Կոնգրես»
միջազգային կազմակերպությանը:
«ՀԿ կենտրոն» ՔՀԶԿ հյուսիսային մասնաճյուղի, Քաունթերփարթ ինթերնեշնլի «Քաղաքացիական
շահերի պաշտպանության աջակցության ծրագրի» և ԱՄՆ միջազգային զարգացման գործակալության
աջակցությամբ, «ԺՆԵԿ» ՀԿ կողմից իրականացվող «Քաղաքացիական վերահսկողություն
ի պաշտպանություն մարդու իրավունքների» ծրագրի շրջանակներում, հրատարակվել
է տեղեկատվական բուկլետ, որում տեղ են գտել տեղեկություններ սույն ծրագրի,
հասարակական վերահսկողության, ինչպես նաև ձերբակալված և կալանավորված անձանց
հիմնական իրավունքների մասին: Տեղեկատվական բուկլետները կտարածվեն կալանավորված
և ձերբակալված անձանց շրջանում, ինչպես նաև կտրամադրվեն նրանց հարազատներին,
բարեկամներին, ինչպես նաև այլ շահագրգիռ անձանց: 1999թ. դեկտեմբերի 17-ին ՄԱԿ-ի Գլխավոր Ասամբլեան, իր 54/120 բանաձևում, հիմք ընդունելով Երիտասարդության համար պատասխանատու նախարարների համաշխարհային կոնֆերանսում (Լիսաբոն, 1998թ. օգոստոսի 8-12) արված առաջարկությունները՝ օգոստոսի 12-ը հայտարարեց Երիտասարդության Միջազգային Օր:
Երիտասարդության միջազգային օրվա առթիվ՝ «Ժողովրդավարական նախաձեռնությունների երիտասարդական կենտրոն» հասարակական կազմակերպությունը շնորհավորում է բոլոր երիտասարդներին: Մաղթում ենք Ձեզ դրսևորել ակտիվ քաղաքացիական դիրքորոշում ցանկացած հասարակական-քաղաքական հարցի վերաբերյալ, լինել նախաձեռնող և մասնակցել կարևոր որոշումների կայացմանն ու իրականացմանը:
«Ոչ ոք լավ քաղաքացի չի ծնվում: Ոչ մի ազգ չի ծնել ժողովրդավարություն: Ավելին, երկուսն էլ գործընթացներ են, որոնք պետք է ձևավորվեն կյանքի ընթացքում: Երիտասարդ մարդիկ պետք է ներգրավվեն ծննդյան իսկ օրվանից: Այն հասարակությունը, որն իրեն կտրում է իր երիտասարդությունից, դադարեցնում է իր գոյությունը»:
Քոֆի Անան, ՄԱԿ-ի գլխավոր քարտուղար
Հարգելի գործընկերներ,
Պատիվ ունենք տեղեկացնելու, որ սկսած սույն թվականի օգոստոսի 1-ից ԺՆԵԿ հասարակական կազմակերպությունը «ՀԿ կենտրոն» ՔՀԶԿ հյուսիսային մասնաճյուղի, Քաունթերփարթ ինթերնեշնլի «Քաղաքացիական շահերի պաշտպանության աջակցության ծրագրի» և ԱՄՆ միջազգային զարգացման գործակալության աջակցությամբ, իրականացնում է «Քաղաքացիական վերահսկողություն ի պաշտպանություն մարդու իրավունքների» ծրագիրը:
Ծրագիրն ուղղված է ՀՀ Արդարադատության նախարարության քրեակատարողական հիմնարկներում և ՀՀ Ոստիկանության ձերբակալված անձանց պահելու վայրերում քաղաքացիական վերահսկողության իրականացմանը, ձերբակալված և կալանավորված անձանց իրավունքների պաշտպանությանը: Ծրագրի շրջանակներում ԺՆԵԿ ՀԿ-ն սերտորեն համագործակցելու է ՀՀ ԱՆ քրեակատարողական հիմնարկներում և մարմիններում և ՀՀ ոստիկանության համակարգի ձերբակալված անձանց պահելու վայրերում վերահսկողություն իրականացնող հասարակական դիտորդական խմբերի հետ:
Ծրագրի իրականացման ընթացքին հնարավորություն կունենաք հետևել մեր կայքի պարբերական
թարմացումների միջոցով:
Հուլիսի 21-ին, Վանաձորի Նժդեհի 14 հասցեում գտնվող հասարակական կազմակերպությունների խորհրդաժողովների սենյակում, տեղի ունեցավ «Պրոֆեսիոնալները հանուն քաղաքացիական հասարակության» ՀԿ կողմից կազմակերպված հանրային քննարկում` նվիրված «Հասարակական կազմակերպությունների մասին» ՀՀ օրենքի նախագծին: Հանրային քննարկման նպատակն էր անդրադառնալ հասարակական կազմակերպությունների ֆինանսական կայունությանը նպաստող հնարավոր օրենսդրական լուծումներին: «ԺՆԵԿ» ՀԿ խորհրդի անդամ էդմոն Մարուքյանը, որպես «Հասարակական կազմակերպությունների մասին» ՀՀ օրենքի նախագիծը պատրաստող փորձագիտական խմբի անդամ, ներկայացրեց օրենքի նախագիծը, այնուհետև պատասխանեց հանրային քննարկմանը մասնակցող, Վանաձորի շուրջ 30 հասարակական կազմակերպությունների և լրատվամիջոցների ներկայացուցիչների հարցերին:
Այսօր Ֆրանսիայի Ստրասբուրգ քաղաքում մեկնարկեց «Բոլորը՛ տարբեր, բոլորը՛ հավասար»
համաեվրոպական երիտասարդական արշավը հանուն բազմազանության, մարդու իրավունքների
և մասնակցության: 1995թ.-ին, Համաշխարհային երկրորդ պատերազմի ավարտից շուրջ
50 տարի հետո, Եվրոպայի խորհուրդը եվրոպական երիտասարդական արշավ կազմակերպեց
«Բոլորը՛ տարբեր, բոլորը՛ հավասար» խորագրով` ռասայական խտրականության, հակասեմիտականության
և քսենոֆոբիայի ու անհանդուրժողականության դեմ պայքարը խթանելու նպատակով: Անցել
է 10 տարի, բայց այդ պայքարը դեռ շարունակվում է: Այդ պատճառով, 2006թ. հունիսից
մինչև 2007թ. սեպտեմբեր, Եվրոպայի խորհուրդն իրականացնելու է բազմազանությանը,
մարդու իրավունքներին և մասնակցությանն ուղղված մի նոր արշավ` հիմնվելով նույն
կարգախոսի վրա և օգտագործելով միևնույն հաջողված խորհրդանիշը:
«Բոլորը՛ տարբեր, բոլորը՛ հավասար» արշավի հիմնական բաղկացուցիչները.
Բազմազանությունը պայման է մշակութային և սոցիալական կյանքի համար և խիստ համահունչ է Եվրոպայի նկարագրին: Բազմազանության խթանումը, հատկապես որպես խտրականության հաղթահարման նախապայման, հարկ է սկսել տեղական մակարդակից: Իր բոլոր նախաձեռնություններում, արշավը կխթանի բազմազանությունը եւ կընդգծի միջմշակութային և միջկրոնական երկխոսության կարևորությունը, որպես սոցիալական համախմբվածության նախապայման:
Մարդու իրավունքների եվրոպական կոնվենցիայի շնորհիվ է, որ պահպանում է մեր միասնականությունը որպես Եվրոպա: Սակայն, այս կոնվենցիայի զատ կա նաև մեկ այլ բան. մարդու իրավուքների ընկալումը և գիտելիքները նրանց մասին: Արշավի միջոցով, մենք կփորձենք ընդլայնել այն նշանակությունը, որ տրվում է մարդու իրավուքներին, եվրոպական բեմահարթակի տարբեր դերակատարների կողմից:
Մասնակցությունն ակտիվ ժողովրդավարական քաղաքացիության առանցքն է և լիապես ընդգրկուն հասարակության նախապայմանը: Արշավն առանձնահատուկ ուշադրություն կդարձնի երիտասարդության մասնակցության խնդրին, քանի որ դա կարող է նպաստել կառուցվածքային խտրականության դեմ պայքարին և բազմազանության խթանմանը:
Մարտի 25-ին «Ժողովրդավարական Նախաձեռնությունների Երիտասարդական Կենտրոն» ՀԿ-ի
գրասենյակում կազմակերպվեց կինո դիտում և քննարկում: Միջոցառման անվանումն էր
«Եվրոպայի Խորհուրդը և Մարդու Իրավունքների Պաշտպանությունը»: Կինոդիտումից անմիջապես
հետո կազմակերպվեց սեմինար քննարկում մարդու իրավունքների մասնագետի հետ: Միջոցառման
բանախոսն էր ԺՆԵԿ ՀԿ խորհրդի անդամ և մարդու իրավունքների փորձագետ պր. Էդմոն
Մարուքյանը:
Հարգելի գործընկերներ,